Lingua

03-05-2011

Marful e Berrobambán Teatro actuarán na Festa da Lingua que terá lugar o 7 de maio en Carballo

O Pazo da Cultura de Carballo acollerá o sábado 7 de maio a cuarta edición da Festa da lingua, un festival que ten o galego como protagonista e no que actuarán o grupo musical Marful, encabezado por Ugia Pedreira, e o teatral Berrobambán, con Paula Carballeira e Chiqui Pereira. A gala será presentada pola comunicadora Yolanda Castaño e conta cun manifesto (A lingua preferida) do escritor carballés Xurxo Borrazás.

Esta festa está organizada pola Área de Normalización Lingüística da Deputación da Coruña e conta coa colaboración dos concellos de Cabana de Bergantiños, Carballo, Malpica de Bergantiños, Ponteceso e Zas. As edicións anteriores tiveron lugar na Coruña e en Ames.

No transcurso da IV Festa da Lingua será entregado, ademais, o II Premio Rosalía de Castro a iniciativas normalizadoras, convocado pola Deputación da Coruña, e que lle foi outorgado á Mesa pola Normalización Lingüística; e o VII Premio a artigos xornalísticos normalizadores, organizado polo Concello de Carballo, e que gañou Marcos Abalde Covelo.

A entrada é de balde, pero débese recoller convite

A entrada a esta festa é de balde, mais débese recoller convite nos servizos de normalización lingüística (SNL) dos concellos colaboradores ou reservar no teléfono 981 704 304, entre o 2 e o 6 de maio, de 11.00 h a 14.00 h. Cada persoa pode recoller un máximo de 4 entradas. As reservas poderanse recoller no despacho de billetes do Auditorio do Pazo da Cultura o mesmo sábado 7 de 19.30 h a 20.30 h.

Música e palabra nunha festa co galego como protagonista

Nesta IV Festa da lingua actuará Marful, o grupo liderado por Ugia Pedreira que supuxo unha revolución musical nos últimos anos, en canto a arranxos, estética e letras de cancións, e que acaba de editar o seu segundo disco, Manual de sedución.

A actriz e contadora Paula Carballeira e mais o actor Chiqui Pereira, de Berrobambán Teatro, traen á festa Ti dis xouba e eu digo parrocha, un divertimento pseudomusical sobre variantes lingüísticas.

E o escritor Xurxo Borrazás é o autor de A lingua preferida, o manifesto desta IV Festa da Lingua, no que declara que non queremos unha lingua celebrada, que a preferimos falada.

Descarga aquí (.pdf) o programa completo e mais o manifesto A lingua preferida, de Xurxo Borrazás >