Lingua

01-02-2012

Naceu Praza Pública, novo xornal electrónico en galego

Logo do peche de varios medios en galego, desde o 1 de febreiro o noso país por fin conta cun novo, Praza Pública, ao que se pode acceder a través de www.praza.com ou www.prazapublica.com.

Praza Pública conta con sete grandes seccións: Política (galega e estatal); Mundo; Movementos sociais, ecoloxía, economía solidaria, consumo; Cultura; Economía; Deportes; e Ciencia e Tecnoloxía e Internet.

A entidade promotora do proxecto é a Fundación Praza Pública, que ten como fin prioritario "o fomento da información e o debate públicos como forma de contribución ao exercicio cívico da cidadanía galega, ben como a promoción da cultura e da lingua galegas". O núcleo de redacción está formado por Marcos Pérez, Lara Graña e David Lombao. Conta, ademais, coa colaboración dun numeroso grupo de xornalistas e son moitas as persoas que colaboran na sección de opinión.

Desde o punto de vista tecnolóxico, trátase dun xornal deseñado integramente para o estándar de HTML5, que aproveita todos os recursos dispoñíbeis na rede, e emprega software libre.

Desde a CTNL felicitamos de xeito entusiasta esta iniciativa, así como as próximas que está anunciado que nazan: Dioivo e Sermos Galiza.