Convocatorias

06-04-2024

A Deputación de Pontevedra convoca as axudas anuais para creación, mantemento e reforzo de SNL

A Deputación Provincial de Pontevedra publicou no BOP do 5 de abril de 2024, as bases das subvencións para a creación, mantemento e reforzo de SNL dirixidas aos concellos e outras entidades locais da provincia de Pontevedra para o ano 2024. No BOP do mesmo día publicouse o extracto da convocatoria.

MODALIDADES DE AXUDAS

A convocatoria establece tres modalidades de axudas:

- creación de novos servizos de normalización lingüística

- mantemento de servizos de normalización lingüística xa existentes

- reforzo de servizos de normalización lingüística xa existentes.

ENTIDADES BENEFICIARIAS

- Para a creación de SNL: concellos da provincia de Pontevedra dun máximo de 50.000 habitantes ou ben as agrupacións de concellos, mancomunidades ou entidades locais menores da provincia.

- Para o mantemento de SNL: concellos da provincia de Pontevedra dun máximo de 50.000 habitantes que no momento da publicación desta convocatoria teñan creado e en funcionamento un SNL.

- Para o reforzo de SNL: concellos que conten con SNL e queiran melloralo contratando máis persoal ou incrementando a xornada do persoal existente.

PERFIL TÉCNICO E FUNCIÓNS DOS SNL

A Deputación Provincial de Pontevedra detalla na convocatoria os requisitos de titulación dos técnicos/as de normalización lingüística e publica unha relación pormenorizada das funcións que debe desenvolver un servizo de normalización lingüística, entre as que se inclúen funcións xerais, de dinamización sociolingüística, de formación sociolingüística, de asesoramento lingüístico interno e de coordinación entre a Deputación e os concellos (base oitava da convocatoria).

PERÍODO QUE ABRANGUE A SUBVENCIÓN

Do 1 de xaneiro ao 31 de decembro de 2024.

ORZAMENTO E CONTÍA MÁXIMA DAS AXUDAS

O orzamento total das axudas será de 200.000 euros.

As contías máximas por SNL e modalidde de axuda son as seguintes:

- creación de novos servizos de normalización lingüística: subvenciónase cun máximo de 35.000 euros, que pode supor o 100% do gasto de persoal, co compromiso adquirido de manter o devandito servizo nas dúas anualidades seguintes e de dotalo nos seus orzamentos económicos coas cantidades correspondentes polas porcentaxes restantes do seu custo salarial.

- mantemento ou reforzo de servizos de normalización lingüística xa existentes: subvenciónase cun máximo de 25.000 euros, que pode supor até un 80% do gasto de persoal.

Se o orzamento total asignado non for suficiente debido a un número elevado de solicitudes, darase prioridade ás axudas para a creación de SNL e repartirase o crédito dispoñible entre as entidades beneficiarias da liña de mantemento e reforzo de SNL.

Do mesmo xeito, de existir aforro tras a repartición das cantidades, e en función do número e do importe das subvencións solicitadas, as axudas incrementaranse proporcionalmente ata chegar ao máximo establecido na base sétima da convocatoria: 100% para a creación de SNL e 80% para o reforzo e o mantemento.

PRESENTACIÓN DE SOLICITUDES E PRAZO

As solicitudes presentaranse obrigatoriamente por medios electrónicos a través do formulario normalizado dispoñible na sede electrónica da Deputación de Pontevedra.

O prazo de presentación de solicitudes é dun mes a partir do día seguinte á publicación da convocatoria e do extracto no BOP, é dicir, até o 6 de maio.

PRAZO DE XUSTIFICACIÓN DAS AXUDAS

De acordo coas bases e co extracto da convocatoria, o prazo de xustificación das axudas remata o 28 de febreiro de 2025.

Bases en .pdf (BOP do 5 de abril de 2024)

Extracto en .pdf (BOP do 5 de abril de 2024)