Formación

30-05-2018

Este verán... en Carballo estaremos traballando na calidade da lingua

O Curso de Verán Traballando na Calidade da Lingua centrarase na calidade no uso da lingua, en como potenciarmos unha lingua de calidade e nas ferramentas para a transmitirmos desde diversos ámbitos, cal o ensino, a tradución, as novas tecnoloxías etc. As sesións constan de palestras, mesas redondas e obradoiros prácticos en que se analizan cuestións fonéticas, gramaticais, fraseolóxicas, textuais etc., de forma a aprimoraren o uso oral e escrito da lingua galega. Alén disto, tamén se dedican sesións destinadas a reparar na importancia dun galego de calidade nos medios audiovisuais en xeral e tamén no ámbito do humor en particular.

OBXECTIVOS

- Analizar o que distingue unha lingua de calidade doutras variedades e usos lingüísticos.

- Dar a coñecer e avaliar experiencias que camiñan no fomento da calidade da lingua desde diversos ámbitos e en como a calidade lingüística pode coadxuvar no proceso de normalización do idioma.

- Propor medidas para mellorar a utilización da lingua galega, cando menos no ámbito público.

PERSOAS DESTINATARIAS

Persoas que traballan ou que están interesadas no proceso de normalización da lingua galega, especialmente técnicos/as de normalización lingüística, docentes, tradutores/as, correctores/as, estudantado etc.

INSCRICIÓN ABERTA, CON PRAZAS LIMITADAS E DESCONTOS PARA SOCI@S DA CTNL

O prazo de matrícula neste curso está aberto até o 15 de xullo de 2018, e o número de prazas está limitado a 65 persoas, que se cubrirán por orde de inscrición.

O prezo xeral do curso é de 50 €, mais o estudantado de calquera universidade, a comunidade universitaria da UdC, as persoas desempregadas e os/as socios/as da CTNL teñen unha tarifa reducida de 30 €. Este prezo inclúe, ademais de todas as actividades e material do curso, os cafés conxuntos e os xantares dos dous días.

A matrícula débese facer a través da Oficina de Cursos da UdC.

ONDE É O CURSO?

O curso terá lugar no Fórum Carballo, praza dos Bombeiros Voluntarios, s/n, 15100 Carballo, A Coruña (situación en Google Maps).

PROGRAMA

O programa e a información completa do curso, alén de posibilidades de aloxamento, poden consultarse no web www.traballandoenlingua.gal. Así mesmo, podes estar atenta/o á páxina de Facebook do curso ou ás redes sociais da CTNL.

Programa completo en .pdf