Lingua

15-02-2019

Constitúese a Asociación de Entidades Locais pola Lingua

Un total de quince concellos de toda Galicia estiveron representados na xuntanza de constitución da Asociación de Entidades Locais pola Lingua, a través dos seus alcaldes e alcaldesas, de concelleiros e concelleiras, e de persoal técnico dos servizos de normalización lingüística. Os concellos que inician esta andaina son A Baña, Ames, A Coruña, Ferrol, Moaña, Narón, O Grove, Ponteceso, Pontevedra, Ribadeo, Rianxo, Rois, Santiago de Compostela, Teo e Vilagarcía de Arousa.

Os integrantes son concellos que xa veñen colaborando en proxectos coma o Apego, o certame Youtubeir@s ou o Club de Debate. O obxectivo da Asociación de Entidades Locais pola Lingua será promover a colaboración entre as distintas institucións para lograr unha xestión máis eficaz dos proxectos colaborativos en materia de lingua.

Na asemblea de hoxe aprobáronse os estatutos e acordouse que a presidencia da asociación recaerá en Rianxo, a vicepresidencia no Concello do Grove, Pontevedra ocupará a secretaría e Ames a tesourería. Ademais, Narón, Rois e Santiago serán ocuparán as tres vogalías da entidade.

A asociación está aberta á incorporación de novas entidades locais sempre que desenvolvan políticas en prol da normalización lingüística e conten no seu organigrama cunha unidade dedicada a executalas.