Formación

20-11-2022

O Simposio ILG 2022 aborda a edición dixital de textos antigos

O Simposio ILG 2022 foi concibido como unha volta ao labor filolóxico primordial, o da ecdótica e a edición de textos, mais cunha ollada renovada, sustentada nas novas tecnoloxías promovidas polas Humanidades Dixitais, interdisciplinar e colaborativa.

Na configuración dos contidos do programa constitúen o núcleo principal as contribucións de especialistas das áreas de Filoloxía Galega e Portuguesa e Historia medieval, que ofrecen un amplo e rico panorama dos proxectos en curso e do potencial presente e futuro na edición dixital de textos galegos e portugueses. Como complemento das anteriores achegas é necesaria a contextualización do estado actual do labor editorial no marco global das Humanidades Dixitais, polo que nas dúas primeiras sesións do simposio recoñecidos especialistas do ámbito ibérico e internacional achegarán a súa experiencia e logros destacados. O simposio adórnase cunha ollada de recoñecemento e homenaxe ao Dr. Harvey L. Sharrer, Emérito da Universidade de California (Santa Bárbara), cofundador dunha das ferramentas dixitais imprescindíbeis para o estudo e edición do patrimonio textual antigo, a BITAGAP (Bibliografía de Textos Antigos Galegos e Portugueses).

LUGAR E DATAS

O simposio terá lugar do 28 de novembro ao 2 de decembro de 2022, en sesións de tarde, no Salón de graos da Facultade de Filoloxía da USC (Avda. de Castelao, s/n, Campus Norte, Santiago de Compostela).

INSCRICIÓN

A inscrición é gratuíta . As persoas que desexen asistir poderán formalizar a inscrición cubrindo este formulario. O prazo remata o día 28 de novembro ás 12 h.

Programa e máis información no web do Instituto da Lingua Galega.