Convocatorias

01-03-2023

A Deputación de Lugo convoca un proceso para a contratación temporal de TNL

A Deputación Provincial de Lugo publicou no BOP do 1 de marzo de 2023 as bases específicas do proceso selectivo para crear unha listaxe de contratación temporal de técnico/a de normalización lingüística.

REQUISITOS DE TITULACIÓN

Licenciatura en Filoloxía Galega; licenciatura en Filoloxía Hispánica (con habilitación de galego); licenciatura en Filosofía e Letras (sección Filoloxía hispánica, subsección galego-portugués); grao universitario en Ciencias da Linguaxe e Estudos Literarios (galego e español); grao universitario de Estudos de Galego e Español; grao universitario en Galego e Portugués: estudos lingüísticos e literarios; ou grao universitario en Lingua e Literatura Galegas.

NIVEL DE GALEGO

Celga 5

SISTEMA DE SELECCIÓN

De acordo coas bases xerais, o sistema de selección será o concurso-oposición. Realizarase en primeiro lugar a oposición e só concorrerán á fase de concurso as persoas que superen esta primeira fase.

Fase de oposición

Abranguerá as seguintes probas:

Proba de coñecementos xerais e específicos, que é obrigatoria e eliminatoria. Esta proba terá carácter teórico e a súa finalidade é que os aspirantes poidan amosar os seus coñecementos sobre as materias comúns e as materias específicas contidas no programa incluído nas bases específicas. A proba poderá consistir, segundo determine o tribunal, en:

Opción 1: a) exame tipo test sobre os temas incluídos no apartado de materias comúns do programa sinalado nas bases específicas; b) exposición por escrito dun tema, das materias específicas do programa contido nas bases específicas.

Opción 2: exercicio tipo test que abarque a totalidade do programa (materias comúns e específicas).

Esta proba cualificarase ata un máximo de 20 puntos e a puntuación mínima para superala será de 10 puntos.

Proba práctica, tamén obrigatoria e eliminatoria. Consistirá na realización dun suposto práctico relacionado coas materias específicas do programa que permita valorar a aplicación dos coñecementos teóricos e capacidades das persoas aspirantes, coñecer as súas habilidades e destrezas e a capacidade de análise.

Esta proba cualificarase ata un máximo de 20 puntos e a puntuación mínima para superala será de 10 puntos.

Proba de galego, en caso de que non se acredite o nivel de coñecemento requirido nas bases específicas, neste caso, Celga 5.

Fase de concurso

Consistirá nun baremo de méritos e nunha entrevista curricular. Nos méritos terase en conta a experiencia laboral, a formación e a superación de exercicios noutros procesos.

PRAZO

O prazo de inscricións é de 10 días naturais desde o seguinte á publicación da convocatoria no BOP, é dicir, o prazo finaliza o 13 de marzo (por ser inhábil o 11 de marzo, último día de prazo).

Bases xerais dos procesos de contratación temporal da Deputación de Lugo, en .pdf (BOP do 6 de abril de 2020, pp. 2-21)

Corrección de erros das bases xerais, en .pdf (BOP do 15 de xullo de 2020, pp. 6-7)

Bases específicas para a listaxe de técnico/a de normalización lingüística, en .pdf (BOP do 1 de marzo de 2023, pp. 1-4)

Pódese consultar a información sobre este proceso selectivo no web da Deputación Provincial de Lugo.