Lingua

27-06-2023

Ordenanza de normalización lingüística do Concello de Narón

O Boletín Oficial da Provincia da Coruña do 27 de xuño de 2023 publicou a aprobación definitiva da Ordenanza de normalización lingüística do Concello de Narón, un texto aprobado no Pleno municipal o 27 de abril de 2023.

Este texto normativo do Concello de Narón declara o galego como idioma oficial do Concello, por ser lingua propia e oficial de Galicia. Por tanto, establécese que "O Concello de Narón empregará o galego en todas as súas accións, nas súas actuacións administrativas, na documentación, na comunicación social, e nas relacións coa cidadanía e con todas as entidades situadas en Galicia, así como con aquelas radicadas fóra da comunidade autónoma que admitan o galego para as actuacións administrativas".

Ao longo dos seus 14 capítulos, 23 artigos e disposición derradeira, regúlase o uso oficial do idioma galego; o ámbito de aplicación; a atención ao público; o emprego da lingua na documentación e actuación administrativa; nas publicacións, accións informativas, formativas e actividades públicas; nas relación coas empresas privadas; na relación con outras administracións; polo persoal ao servizo da Administración; na toponimia, nomes de rúas, edificios e outras localizacións; e na sinalización e rotulación. Tamén se establece a responsabilidade do concello no impulso institucional do idioma e o labor de mellora da calidade e corrección lingüísticas e da linguaxe inclusiva.

O SERVIZO DE NORMALIZACIÓN LINGÜÍSTICA

O texto da ordenanza recolle no seu artigo 22 que o Concello de Narón conta cun servizo de normalización lingüística, "departamento técnico encargado de impulsar a normalización da lingua galega, procurar o incremento do uso e prestixio do idioma galego no ámbito municipal e coordinar as accións necesarias para darlle cumprimento a esta ordenanza".

No mesmo artigo detállanse as funcións deste departamento, que se clasifican en catro áreas: funcións xerais, funcións de dinamización lingüística, funcións de formación sociolingüística e funcións de asesoramento lingüístico.

Tamén se establece no artigo 23 a creación dunha comisión político-técnica de seguimento da ordenanza, co fin de analizar o seu cumprimento e desenvolvemento e rpopor medidas para a súa aplicación.

A ordenanza do Concello de Narón entrará en vigor aos 15 días da súa publicación no BOP.

Ordenanza de normalización lingüística do Concello de Narón, en .pdf