10-02-2010Queremos Galego rexistra no Parlamento unha Iniciativa lexislativa popular (ILP) para que se garantan por lei os dereitos lingüísticos e a promoción do galego na administración e no ensino
A plataforma cidadá Queremos Galego presentou unha Iniciativa lexislativa popular (ILP), coa intención de que se debata e aprobe no Parlamento galego. A iniciativa pretende garantir por lei os dereitos lingüísticos dos/as galegofalantes na súas relacións coas administracións públicas e no ensino, desenvolvendo o consenso estabelecido na Lei de normalización lingüística e no Plan xeral de normalización da lingua galega.
A ILP foi rexistrada no Parlamento galego o luns 8 de febreiro. Agora, a Mesa do Parlamento conta cun mes para admitila a trámite. Tras ser admitida a plataforma Queremos Galego conta cun prazo de tres meses nos que deberá recoller como mínimo as 15.000 sinaturas necesarias para o seu debate no pleno parlamentar.
O
texto da iniciativa presentada conta con dous títulos, un “Sobre o uso do galego como lingua oficial das administracións de Galiza” e outro “Sobre o uso do galego no ámbito do ensino”.
No primeiro deles estabelécese que todas as entidades públicas galegas deben usar por defecto o galego nas súas actuacións; que o persoal ao seu servizo debe ter unha capacitación tanto oral como escrita en lingua galega suficiente para poder desenvolver o seu traballo nesta lingua, para o que as bases das convocatorias deben estabelecer, como mínimo, o desenvolvemento dunha das probas do proceso selectivo en galego; ou que os contratos e subvencións da administración deben producir un aumento do uso do galego na entidade receptora.
No segundo dos títulos, dedicado ao ensino, sinálase que o número de horas de ensino en galego será, como mínimo, do cincuenta por cento do horario lectivo, tal e como estabelece o PXNLG aprobado por unanimidade en 2004; que a Xunta debe promover o uso do galego na docencia universitaria; ou que a Administración educativa, o seu persoal e os centros, deben usar o galego.
Esta iniciativa está impulsada pola plataforma
Queremos Galego e foi rexistrada coas sinaturas de representantes das entidades que a constitúen, como a CTNL, e por outras persoas significativas do ámbito da lingua, da creación, do ensino, da música, da literatura, da comunicación, etc.
Texto da ILP de Queremos Galego (.pdf, 52 KB)