CTNL

30-08-2011

A SXPL négase a dar información sobre as subvencións para a promoción da lingua desde os concellos

Cumpriranse o 11 de setembro 6 meses desde que o DOG publicou a Orde pola que se establecen as bases para a concesión de subvencións ás entidades locais de Galicia para a promoción do uso da lingua galega, na que, segundo se sinala no seu artigo 14 «De non notificarse resolución no prazo de seis meses contados desde a publicación desta orde no Diario Oficial de Galicia, os interesados poderán entender desestimadas as súas solicitudes por silencio administrativo».

Desde a CTNL denunciamos en anos anteriores a ineficacia desta convocatoria debido á tardanza na resolución, mais até agora nunca se tardou tanto como este ano nin se lle negara información a esta entidade que aglutina aos/ás traballadores/as de normalización lingüística, polo que non podemos deixar de sospeitar que a Xunta de Galicia quere facer desaparecer estas axudas vía silencio administrativo.

Desde a CTNL levamos meses solicitando información, mais a SXPL nin sequera se dignou a contestar as nosas solicitudes. Tamén o intentamos mediante a central de información de Xunta, que só nos remite á SXPL.

Da CTNL enviamos peticións de información á SXPL o 4 de xullo, o 12 de xullo, o 19 de xullo e o 11 de agosto, e ningunha desas peticións foi nin sequera contestada. Posteriormente, o día 16 de agosto, enviamos a mesma solicitude de información á central de información da Xunta de Galicia, desde a que si nos contestaron, mais só para dicirnos que a información solicitada lla debemos demandar á Secretaría Xeral de Política Lingüística...

Desde a CTNL solicitámoslle á SXPL que resolva esta convocatoria de subvención canto antes.